من أقوال خالتي اللتاتة!
- تعريف الراجل الوفى المخلص.. هوه نفس الراجل الخاين زى غيره بس عمره ما انكشف.
- لو شكلنا وزارة من أى عيلة: هتلاقى الأب هوه وزير المالية، والأم وزيرة الداخلية، والبنت الكبيرة دى المستشارة، والأخ الكبير ده وزير المواصلات، أما آخر العنقود بقى يبقى بتاع المخابرات.
- البلد دى مش هيتصلح حالها إلا لما الست اللى بتغنى "يارب كتر أفراحنا" ما تقولش "وعلى قد نيتنا ادينا".
- هيه لما كل واحدة تقول على ابنها: ده انا مربياه أحسن تربية.. أمال مين ولاد المتضايقة اللى بنقابلهم فى الشارع دول؟
- فيه بنات فاهمين الأنوثة غلط.. تقول لك: يععع مش باكل لحمة عشان حيوانات.. يععع باقرف م السمك عشان كان فى البحر.. يعع البطيخ لأ عشان فيه بذر.. الجزر لأ عشان له شراشيب.. طب دى جينيفر لوبيز بتاكل جراد.. جينفير لوبيز يا مصدّيّة منك ليها.
- الواحدة تبقى شبه البالون الطائر، وتروح تطلب أكل: لو سمحت عايزة عشرين ساندويتش شاروما وعشر قطع جاتوه، وهات واحدة حاجة ساقعة دايت عشان الريجيم.
- شد حيلك يابنى وخليك فاشل فى الدراسة زى زوكربرج بتاع الفيس بوك، وزى ستيف جوبز بتاع آبل وزى بيل جيتس بتاع ميكروسوفت، إنما لو شديت حيلك زى ابن طنط عفاف وخدت ماجستير هتشتغل على توك توك فى الطالبية.
- لما تيجى تشترى مقص علبته مقفولة تلاقى مكتوب عليه من فوق: رجاء قص من هنا.. وهوه انا لو عندى مقص كنت أشتريته ليه يا أذكى اخواتك؟
ليست هناك تعليقات:
إرسال تعليق
مرحباً سوف نرد على رسالتك في أقرب وقت
Ashraf Heikal